मृत्युको २० वर्षपछि पनि उत्तिकै लोकप्रिय राजा वीरेन्द्र
योहो संवाददाता- today2020-12-30 12:44:39
काठमाडौँ - स्वर्गीय राजा वीरेन्द्र शाहको ७६ औँ जन्मजयन्ती आज मनाएको छ । ललितपुरको जावलाखेलस्थित वीरेन्द्रको शालिकमा माल्यापर्ण गरी श्रद्धाञ्जलि अर्पण गरिएको छ । राजा वीरेन्द्र नेपालको शाह वंशीय राजाहरु मध्यका देश भक्त र जनप्रिय भएको सर्वसाधारण बताउछन ।
नारायणहिटी दरबारको कहालीलाग्दो हत्याकाण्डमा परी राजा वीरेन्द्रको मृत्यु भएको २० वर्ष बितिसकेको छ । यति लामो भइसक्दा पनि पुरानो पुस्ताका व्यक्तिले मात्र होइन नयाँ पुस्ताले उनको उदार छविलाई बिर्सन सकेको छैन । उनी बाँचिरहेका भए मुलुकमा राजतन्त्रको अन्त्य हुँदैनथ्यो भन्ने अनुमान गर्ने पनि धेरै छन् ।
२०२८ सालमा राजगद्दी सम्हालेका उनले बाबु महेन्द्रद्वारा अपहरित प्रजातन्त्र पुनःस्थापनाका लागि देखाएको उदारतालाई अहिलेका राजनीतिज्ञसमेत मुक्तकण्ठले प्रशंसा गर्छन् । २०३६ को जनमत संग्रह होस् वा १० वर्षपछि निर्दलीय पञ्चायती व्यवस्था हटाएर प्रजातन्त्र पुनःस्थापना गरेको सन्दर्भ होस् उनको उदारताको प्रशंसा सर्वत्र हुने गर्छ ।
पञ्चायती व्यवस्थामा राजालाई बढी अधिकार दिइएको थियो । संविधानबमोजिम नै राजा बढी शक्तिशाली हुन्थे । बहुदलीय व्यवस्था आउँदा आफ्ना अधिकार गुम्न सक्ने वीरेन्द्रलाई थाहा नभएको विषय थिएन । तर पनि राजा वीरेन्द्र नागरिकलाई अधिकार दिन सहमत भएका थिए ।
प्रजातन्त्र पुनःस्थापनादेखि लोकतन्त्र हुँदै मुलुक संघीय गणतन्त्रात्मक व्यवस्थामा प्रवेश गरेको पनि एक दशक नाघिसकेको छ । राजतन्त्र ढाल्न पाए देशमा चमत्कार हुने राजनीतिक दलकानेताहरू आफ्नै दुनो सोझ्याउन व्यस्त छन् । यस्तो वेला राजा वीरेन्द्रको खाँचो महसुश हुने गरेको छ ।
