Breaking

मन्त्रीमण्डल विस्तार अझै अन्यौल, सत्तारुढ दलहरुमा मन्त्री छान्नै सकस



काठमाडौँ –गत असार २८ गते सर्वोच्च अदालतले गरेको फैसलाबाट प्रतिनिधिसभा पुनस्र्थापना मात्रै भएन, नेपाली कांग्रेसका सभापति शेरबहादुर देउवाको नेतृत्वमा सरकार गठन समेत भयो । सरकार गठन भएको तिन साता बितिसक्दा समेत प्रधानमन्त्री देउवाले मन्त्रीमण्डल बिस्तार गर्न सकेका छैनन् ।

५ दलीय सत्ता गठबन्धन ३ साता वितिसक्दा पनि सरकारलाई पूर्णता दिन असफल देखिनुमा ति दलहरुभित्र मन्त्रीका आकांक्षी धेरै भएकाले हो । सबैजसो सांसदहरु मन्त्री बन्न चाहेपछि कसलाई बनाउने कसलाई नबनाउने भन्नेमा समस्या परेको छ । उता एमालेको माधव नेपाल पक्षलाई पनि सरकारमा सहभागि गराउने प्रयास भइरहँदा मन्त्रीमण्डल विस्तारमा ढिलाई भएको बुझिएको छ ।

मन्त्रीमण्डलमा कांग्रेसले ८ तथा माओवादी र जसपाले ७–७ मन्त्रालय लिने सहमति भने बनि सकेको छ । संविधानमा २५ जनाभन्दा बढी मन्त्रि बनाउन नपाइने व्यवस्था छ । सरकारमा प्रधानमन्त्रीसहित ६ जना सहभागी भइसकेका छन् । अब १९ जनासम्मलाई मन्त्री बनाउन सकिनेछ ।

सोमबार सत्तारुढ गठबन्धनका शिर्ष नेताहरुको छलफल न्युनतम साझा कार्यक्रम, सरकार सञ्चालनको कार्यविधि र आचारसंहिता बनाई अघि बढ्ने सहमती भने भएको छ । बैठकले सरकार संचालनका लागि कसरी अघि बढ्ने भन्ने सन्दर्भमा कार्यदलले तयार पारेको मस्यौदालाई अन्तिम रुप दिने सहमती गरेको छ